Athrú ar Uaireanta Clárúcháin

Tá athrú beag déanta ar na huaireanta clárúcháin i gcomhair eachtra na bliana seo. Is é seo an sceideal deimhnithe don tráthnóna:

18:00 Osclófar an deasc clárúcháin do shnámhaithe.

19:00 Dúnfar an deasc clárúcháin agus tabharfar óráid sábhailteachta.

19:30 Tosóidh an snámh!

Tá súil againn go n-oiriúnóidh na huaireanta clárucháin nua seo le daoine a bheidh ag teacht díreach óna n-áiteanna oibre ar an oíche.

Advertisements

Léarscáil Snámha

Níl ach mí amháin idir sinne agus Snámh Cuimhneacháin Martin Duggan na bliana seo agus táimid ag tnúth go mór leis. Tá sos beag curtha ar fheabhsú na haimsire agus ar ardú theocht an uisce ach gealltar go mbeimid ar ais ar an mbóthar ceart i gcionn tamaillín bheag eile. Tá léarscáil curtha le chéile againn chun sibh a chur ar an eolas faoi suíomh an tsnámha, áiteanna páirceála agus a leithéid (cliceáil ar na deilbhíní):


Ná déan dearmad go bhfuil iontrálacha ar oscailt agus nach bhfuil uait ach dul chuig ár leathanach Iontrála chun a fháil amach conas d’ainm a chur san áireamh…

Duaiseanna d’eachtra na bliana seo…

Tá an aimsir ag dul i bhfeabhas seachtain i ndiaidh seachtaine um an taca seo agus tá súil againn go bhfuil sibh go léir ag dul ar ais chun na n-aibhneacha, na lochanna agus na farraigí agus séasúr an tsnámha faoin aer ag druidim linn.

Lógó – The Edge SportsChun sibh a spreagadh in bhur dtraenáil, tá áthas orainn á fhógairt go mbeidh ceithre dhearbhán, €25 an ceann, don siopa spóirt, The Edge Sports, i gCorcaigh le buachan ag an Snámh Cuimhneacháin Martin Duggan 2013. Bronnfar na dearbháin seo ar na snámhaithe is tapúla sna catagóirí seo a leanas ar an lá:

  • Fireann (Gan Chulaith)
  • Baineann (Gan Chulaith)
  • Fireann (Culaith)
  • Baineann (Culaith)

Ba mhaith linn ár mbuíochas a ghabháil le The Edge Sports as na dearbháin seo a thabhairt dúinn mar urraíocht don eachtra. Is siopa mór-éilimh i measc na snámhaithe agus lúthchleasaithe eile é The Edge Sports agus tá súil againn go mbainfidh na buaiteoirí tairbhe as a ndearbháin.

Comh maith le duaiseanna do na snámhaithe is tapúla, tá duais mór eile againn don snámhaí is óige a chríochnaíonn an snámh ar an lá. Is é sin an Sciath Chuimhneacháin Martin Duggan. Thug muintir Duggan an sciath seo go cineálta dúinn ag tosach ceart na heachtra sa bhliain 2009.

Téigh go dtí ár leathanach Iontrála chun d’ainm a chur isteach d’eachtra na bliana seo…

Teocht na hAbhann ag Ardú!

Tráthnóna inné, chuaigh Dave Mulcahy agus Owen O’Keefe ag snámh san abhainn don chéad uair le mí anuas. Bhí teocht an uisce thart ar 6ºC nuair a bhí siad ann ar Lá ‘le Pádraig agus ní raibh siad ag súil le haon dul in airde ar an teocht sin inné. Bhí ionadh taitneamhach orthu, áfach, nuair a bhí ardú 2ºC nó mar sin tagtha uirthi. Cinnte, chabhraigh sé leis gur thráthnóna aoibhinn gréine a bhí ann, ach fós féin b’fheabhas iontach iad an 2ºC sin ón bhfuacht a bhí le mothú ceithre seachtaine ó shin.

Chomh maith leis an ardú teochta, tá an-dul chun cinn á dhéanamh ar an bhfánán nua taobh leis an gClub Rámhaíochta. Tá mórán siolta tar éis síothlú ar an bhfánán le déanaí ach is éasca fáil réidh leis sin. Tá súil againn go mbeidh an fánán seo críochnaithe roimh lá eachtra na bliana seo agus, má tá, beidh sé i bhfad níos éasca agus níos sábháilte do dhaoine dul isteach san abhainn agus teacht amach arís, go háirithe le linn eachtraí.

Ná déan dearmad go bhfuil iontrálacha ar oscailt don tSnámh Cuimhneacháin Martin Duggan 2013 agus níl uait ach dul chuig ár leathanach Iontrála chun gach sonra i dtaobh na hiontrála a fháil amach duit féin…

Iontrálacha oscailte i gcomhair SCMD 2013

Tá an-áthas orainn á fhógairt go bhfuil iontrálacha ar oscailt do Shnámh Cuimhneacháin Martin Duggan na bliana seo, a bheidh ar siúl Dé hAoine, 14 Meitheamh. Beidh an snámh ar siúl sa ghnáth-áit, Fermoy Rowing Club ar an Abhainn Mhóir, agus beidh sé 2 km ar fhaid. Más mian leat iontráil, is féidir leat á dhéanamh tré leannúint na dtreoracha thíos (tá níos mó eolas ar fáil ar ár leathanach Iontrála). Beidh clárú ar oscailt ón 17:30 go dtí an 18:30 ar an lá agus tosnóidh an snámh ar an 19:30. Coimeád súil ar an mblag seo an t-eolas is deireanaí a fháil…

Treoracha Iontrála:

Is féidir leat iontráil ar an idirlíon nó, dá mb’fhearr leat, ar pháipéar. Dá mb’fhearr leat iontráil ar líne, níl uait ach cliceáil ar an nasc thíos agus tarraingeofar díreach chuig ár leathanach eachtra Active.com tú, áit is féidir leat iontráil láithreach bonn.

Cnaipe – Owen O'Keefe

Dá mb’fhearr leat iontráil ar pháipéar, is féidir leat an Entry Form* a íoslódáil, é a líonadh agus a sheoladh (leis an táille iontrála chuí) chuig an tUas. Owen O’Keefe, 3 Páirc an Fhionnuisce, Mainistir Fhear Maí, Contae Chorcaí, Éire nó é a scanadh agus a chur i ríomhphost chuig blackwaterswim@gmail.com – ná déan dearmad ar an Parental Consent Form* a chur san áireamh má bheidh tú 17 mbliana d’aois nó níos óige ar lá an tsnámha! Gheobhaidh tú ríomhphost ag deimhniú d’iontráil.

*Gabh ár leithscéil nach bhfuil an córas iontrála ar fáil as Gaeilge go fóill. Is de bharr cúrsaí árachais an neamhréireacht seo. Tá súil againn go mbeimid in ann córas iontrála Gaeilge a chur ar fáil go luath.

Féilire Snámha na Mumhan 2013

Tá an féilire sealadach i gcomhair snámhanna faoin aer i gCúige Mumhan don bhliain 2013 eisithe ag Finbarr Hedderman an tseachtain seo. Do heisíodh i mBéarla amháin é ach tá sé aistrithe go Gaeilge againn agus is féidir é a íoslódáil trí chliceáil ar an nasc seo a leanas: Féilire Snámha na Mumhan 2013

Nótáil go bhfuil na dátaí agus gach eolas atá le feiceáil ar an bhféilire seo tabhartha mar threoracha amháin agus go gcaithfear gach sonra a bheith deimhnithe le stiúrthóirí na heachtraí éagsúla. Tá níos mó eachtraí le bheith curtha leis an bhféilire fós…

Fáilte go dtí ár suíomh idirlín nua!

Is é do bheatha go dtí suíomh idirlín nua an tSnámh Cuimhneacháin Martin Duggan. Caith súil ar ár leathanach Faoi agus ar ár gCartlainn Torthaí chun á fháil amach cé sinn. Eagrófar snámh na bliana seo Dé hAoine, 14 Meitheamh agus beidh iontrálacha ar oscailt go luath ar ár leathanach Iontrála!

Coimeád súil ar an suíomh idirlín seo chun nuashonrúcháin a fháil mar gheall ar na hullmhúcháin chun an SCMD 2013 agus ná déan dearmad gur féidir leat dul i dteagmháil linn trínár leathanach Teagmhála má tá aon cheist nó iarratas agat…